સંસદના ચોમાસુ સત્રની વચ્ચે ઉપરાષ્ટ્રપતિ જગદીપ ધનખરનું રાજીનામું: ‘તાત્કાલિક અસરથી’ પદ છોડવાની જાહેરાત
દેશ
Jagdeep Dhankhar resignation: ભારતના ઉપરાષ્ટ્રપતિ જગદીપ ધનખડે ચોમાસુ સત્રની મધ્યમાં જ ઉપરાષ્ટ્રપતિ પદ પરથી તાત્કાલિક અસરથી રાજીનામું આપી દીધું છે. રાષ્ટ્રપતિ દ્રૌપદી મુર્મુને સંબોધિત એક પત્રમાં, તેમણે પોતાના નાદુરસ્ત સ્વાસ્થ્યનો હવાલો આપીને બંધારણની કલમ 67(a) હેઠળ આ પદત્યાગની જાહેરાત કરી હતી. તેમણે આ સમયગાળા દરમિયાન રાષ્ટ્રપતિ તરફથી મળેલા સહયોગ અને સૌહાર્દપૂર્ણ સંબંધો બદલ આભાર વ્યક્ત કર્યો હતો. આ અણધાર્યા રાજીનામાથી રાજકીય વર્તુળોમાં આશ્ચર્ય પ્રસર્યું છે.
ભારતીય રાજનીતિમાંથી એક મોટા સમાચાર સામે આવ્યા છે, જ્યાં દેશના ઉપરાષ્ટ્રપતિ જગદીપ ધનખડે પોતાના પદ પરથી રાજીનામું આપી દીધું છે. ખાસ વાત એ છે કે, સંસદનું ચોમાસુ સત્ર હાલ ચાલી રહ્યું છે તેની વચ્ચે જ આ અણધાર્યો નિર્ણય લેવામાં આવ્યો છે.
ઉપરાષ્ટ્રપતિ જગદીપ ધનખડે તાત્કાલિક અસરથી ઉપરાષ્ટ્રપતિ પદનો ત્યાગ કરવાની જાહેરાત કરી છે. તેમણે પોતાનું રાજીનામું રાષ્ટ્રપતિ દ્રૌપદી મુર્મુને સુપરત કરતા એક પત્ર લખ્યો હતો. આ પત્રમાં, તેમણે પોતાના નાદુરસ્ત સ્વાસ્થ્યને રાજીનામા પાછળનું કારણ દર્શાવ્યું હતું.
બંધારણીય જોગવાઈ હેઠળ રાજીનામું
જગદીપ ધનખરે બંધારણની કલમ 67(a) હેઠળ રાજીનામું આપવાની જાહેરાત કરી છે. ભારતીય બંધારણની આ કલમ ઉપરાષ્ટ્રપતિના રાજીનામા સંબંધિત જોગવાઈઓ પૂરી પાડે છે. સામાન્ય રીતે, ઉપરાષ્ટ્રપતિ પોતાનો કાર્યકાળ પૂરો થાય તે પહેલાં રાષ્ટ્રપતિને સંબોધીને પોતાના હસ્તલિખિત રાજીનામા દ્વારા પદ છોડી શકે છે.
રાજીનામા પત્રમાં, ઉપરાષ્ટ્રપતિ ધનખરે રાષ્ટ્રપતિ દ્રૌપદી મુર્મુનો કાર્યકાળ દરમિયાન મળેલા સહયોગ અને બંને વચ્ચેના સૌહાર્દપૂર્ણ સંબંધો બદલ હૃદયપૂર્વક આભાર વ્યક્ત કર્યો હતો. તેમના આ રાજીનામા બાદ, હવે નવા ઉપરાષ્ટ્રપતિની ચૂંટણી પ્રક્રિયા હાથ ધરવામાં આવશે.
