મુંબઈ એરપોર્ટ પર સાત ગુજરાતીની ધરપકડ, નકલી વિઝા પર યુરોપ જવાની ફિરાકમાં હતા

અમદાવાદ: મુંબઈ એરપોર્ટ પરથી સાત ગુજરાતીઓની ધરપકડ કરવામાં આવી છે, આ તમામ લોકોને દુબઈથી ડિપોર્ટ કરવામાં આવ્યા હતા. શુક્રવારે રાતે આ ગુજરાતીઓ મુંબઈ લેન્ડ થયા ત્યારે ઈમિગ્રેશન ઓફિસર વિષ્ણુ સાવંતે તેમના ટ્રાવેલ ડોક્યુમેન્ટ્સ ચેક કર્યા હતા, જેમાં એવું જાણવા મળ્યું હતું કે તમામને દુબઈથી પાછા મોકલાયા છે.

મુંબઈ એરપોર્ટ પર તૈનાત ઈમિગ્રેશન સ્ટાફે વધુ તપાસ કરતા તેમના શેંગેન એમ્પ્લોયમેન્ટ વિઝા નકલી હોવાનું જણાયું હતું. સહાર પોલીસ સ્ટેશનમાં નોંધાયેલી ફરિયાદ અનુસાર સાતેય આરોપી યુરોપ જઈ રહ્યા હતા અને દુબઈ એરપોર્ટ પર ટ્રાન્ઝિટ દરમિયાન તેમના વિઝા નકલી હોવાનું બહાર આવતા તમામને ઈમિગ્રેશન ઓથોરિટી દ્વારા અટકાયતમાં લઈ મુંબઈ ડિપોર્ટ કરાયા હતા.